I Ngarkuari me Punë i Bashkimit Evropian në Tiranë, ambasadori Luigi Soreca mori pjesë sot në Forumin e OSBE-së për Zhvillimin e Medias të mbajtur sot në Tiranë.

Soreca rikonfirmoi se, liria e medias është në qendër të politikës së zgjerimit të BE-së.

Ai inkurajoi qeverinë shqiptare dhe autoritetet publike që të angazhohen me komunitetin e medias dhe palët e interesuara për të adresuar sfidat e mbetura: përmirësimin e kushteve të punës për gazetarët, kërcënimet ndaj gazetarëve dhe adresimin e çështjeve sistematike të pronësisë së medias.

Negociatat e anëtarësimit të Shqipërisë në BE janë një mundësi për të bërë përparim në lirinë e medias në Shqipëri, theksoi ndër të tjera Soreca.

I nisur në vitin 2015, Forumi për Zhvillimin e Medias shërben si një platformë për diskutimin e çështjeve të lirisë dhe zhvillimit të medias në Shqipëri mes gazetarëve, ekspertëve dhe institucioneve përkatëse. Këtë vit diskutimet u përqendruan te siguria e gazetarëve, legjislacioni që prek mediet dhe ndikimi i inteligjencës artificiale në punën e medieve në Shqipëri.