Kryetari i bashkisë së Beratit, Ervin Demo priti sot në një takim zv/presidentin e Bankës Botërore për Politikat dhe Procedurat, Ed Mountfield, i shoqëruar nga drejtori i Bankës Botërore për Shqipërinë, Emanuel Salinas.

Demo bëri të ditur se gjatë takimit u diskutua mbi investimet e realizuara në Berat në kuadër të projektit për zhvillim të integruar urban dhe turistik, të cilat kanë ndikuar në rritjen e turizmit në Berat.

“Zv/presidenti i Bankës Botërore vlerësoi pozitivisht ecurinë e investimeve për rehabilitimin e peizazhit urban në Goricë, Mangalem dhe në zonën e mbrojtur, përfshirë sheshin e ‘Portës së Pashait’, zonën pranë Muzeut Etnografik dhe rrugën ‘Mihal Komneno’”, theksoi Demo.

Bashkia e Beratit është cilësuar si një model për projektet e Bankës Botërore dhe Banka ka konfirmuar vijimin e mbështetjes për projekte të reja, për të siguruar qëndrueshmërinë e investimeve të kryera.