Nga Mevi Rafuna, Prishtinë

Poezi dedikuar fëmijëve të Familjes Jashari në 25-vjetorin e flijimit të tyre, të vrarë nga ushtria mizore serbe.

Pëllumbat e Përjetësisë!

*Asnjë nënë nuk hap dot një varr për fëmijën e saj
Dardanisë i hapen varre në shpirt
Vargu im nuk e mbanë peshën e përjetësisë
Toka nuk i mbanë vdektarët
Engjëjt i përkasin qiellit
Të pavdekshmit i përkasin qiellit.

U munduan t’ia këpusin rrënjët Dardanisë
Të ja humbasin përgjithmonë fillin
Mbi trojet tona qelën trëndafila me aromë të freskët gjaku…

I këputën dhunshëm trëndafilat
Dhe pamëshirë i vranë pëllumbat
Sytë e magjishëm të fëmijëve u shuan
Me dëshirat e pathëna.

Këtu mizoria kishte lëshuar rrënjë
Një shekull i gjakosur i etur për krijesa të dënuara me “mëkatin e pafajsisë”.

** Tani për juve këndojmë këngë, thurim vargje poezie, shkruajmë ese dhe romane…
Jo të gjithë mund ta mbajnë barrën e pavdeksisë.

Fëmijët e Dardanisë luajnë, qeshin dhe këndojnë
Ëndrra e juaj
Ishte liria jonë.

* Përse bëhen plumbat për t’i vrarë pëllumbat…

Fëmijët duhet të rriten e jo të vriten.

Edhe yjet edhe dielli edhe hëna qanë
Nuk e duruan kurrë mizorinë…

Ç’faj kanë fëmijët?!

Është një pyetje që vetes ja kam bërë qysh kur isha fëmijë.

** Yjet do i qëndisin në qiell emrat tuaj me zjarrin e përjetësisë.
Atje ku ngjyrat krijojnë mrekulli
Dhe ku barbaria nuk arrinë…

*** Shpirtrat e dritës nuk e duan errësirën
nuk e durojnë robërinë.
I këpusin zingjirët e ferrit për të tjerët që do vijnë pas tyre.

Fëmijët e familjes JASHARI të vrarë më 5, 6 dhe 7 mars, 1998 nga forcat kriminale militare dhe paramilitare sërbe:

1. Hidajete Jashari (10) vajza e Rifat Jasharit.
2. Valdete Jashari (15), vajza e Rifat Jasharit.
3. Igball Jashari (13), djali i Rifat Jasharit.
4. Igballe Jashari (11), vajza e Rifat Jasharit.
5. Afete Jashari (17), vajza e Hamëz Jasharit.
6. Besim Jashari (16), djali i Hamëz Jasharit.
7. Lirie Jashari (15), vajza e Hamëz Jasharit.
8. Blerim Jashari (12), djali i Hamëz Jasharit.
9. Fatime Jashari (9), vajza e Hamëz Jasharit.
10. Blerinë Jashari (7), vajza e Hamëz Jasharit.
11. Fitim Jashari (17), djali i Adem Jasharit.
12. Kushtrim Jashari (13), djali i Adem Jasharit.