Kryetarja e Gjykatës Kushtetuese, Fiona Papajorgji priti sot në një takim kortezie në ambientet e kësaj gjykate, kreun e zyrës së Këshillit të Europës në Tiranë, Giulia Re.

Re uroi Papajorgjin për marrjen e detyrës dhe rikonfirmoi mbështetjen e Këshillit të Evropës për vazhdimin dhe realizimin e projekteve të ndërmarra në kuadër të reformës në sistemin e drejtësisë në Shqipëri. Aktualisht, Zyra e Këshillit të Europës ka ndërmarrë një nismë për të mbështetur Gjykatën Kushtetuese në ngritjen e një sistemi bashkëkohor të menaxhimit të çështjeve dhe digjitalizimit të arkivës së saj. Ky projekt financohet nga Agjenci SIDA për llogari të Ambasadës suedeze në Tiranë.

Nga ana e saj, Papajorgji shprehu vlerësimin për bashkëpunimin e deritanishëm të Gjykatës Kushtetuese me Këshillin e Europës, si dhe theksoi rëndësinë e vazhdimit të këtij bashkëpunimi, duke nënvizuar se mbështetja e Këshillit të Europës ka qenë dhe mbetet një faktor i çmuar për rritjen e kapaciteteve institucionale.

Kryetarja Papajorgji shprehu gjithashtu bindjen se partneriteti i ngushtë me Këshillin e Europës do të kontribuojë në konsolidimin e mëtejshëm të shtetit të së drejtës dhe përafrimin e jurisprudencës kushtetuese me standardet më të mira europiane.

Burimi ATSH