Ministria e Shëndetësisë dhe Mbrojtjes Sociale, po vazhdon investimin në aparatura me teknologji moderne për kurimin dhe ndërhyrjet kirurgjikale në spitalin onkologjik.

Kryeministri Edi Rama, u shpreh sot se “në njësinë e Radioterapisë në Shërbimin Onkologjik ka mbërritur akseleratori i tretë, për të cilin ka nisur puna për montimin dhe vënien në funksionon brenda pak javësh”.

Sipas Ramës, “kjo aparaturë e fjalës së fundit, jo vetëm redukton ndjeshëm fluksin dhe radhët por realizon edhe trajtimin me precizion te lartë dhe në thellësi të masave tumorale në varësi të diagnozave të përcaktuara nga mjekët onkologë”.

Spitali Onkologjik disponon edhe dy akseleratorë të tjerë linearë, nëpërmjet të cilëve trajtohen me radioterapi pjesa më e madhe e tumoreve solide që kanë nevojë për këtë lloj trajtimi me teknika precize të avancuara, gjerësisht të përdorura në vendet e zhvilluara 3DcRT, IMRT, IGRT dhe VMAT.

Pak ditë më parë, u realizua edhe një tjetër investim në sallat e reja të kimioterapisë në spitalin Onkologjik, që erdhi si rezultat i bashkëpunimit mes Ministrisë së Shëndetësisë dhe Mirëqenies Sociale dhe partnerëve.

Sallat e reja të kimioterapisë dhe përmirësimi i kushteve për pacientët që marrin shërbim në pavionet e këtij spitali, janë vetëm hapi i parë drejt një trajtimi të sigurt dhe dinjitoz për të gjithë qytetarët.

Në buxhetin 2026 për herë të parë është planifikuar rimbursimi i të gjitha barnave antitumorale për pacientët që trajtohen në këtë spital, duke rritur fondin me 1,5 miliardë lekë dhe duke krijuar një mbështetje më të plotë për trajtimin.

Paralelisht, spitali Onkologjik ka nisur zbatimin e shërbimeve të reja digjitale, si receta elektronike dhe dosja elektronike e pacientit (e-file), duke përmirësuar ndjekjen dhe menaxhimin e trajtimit për çdo pacient.

Burimi ATSH