Kryetari i grupit parlamentar të Partisë Socialiste, Taulant Balla, deklaroi sot për mediet se gjatë mbledhjes së grupit parlamentar është diskutuar edhe ngritja e Komisionit të Etikës brenda Partisë Socialiste.

I pyetur lidhur me këtë proces, Balla sqaroi se Komisioni i Etikës nuk ka të bëjë me grupin parlamentar, por me strukturat e partisë.

“Mbledhja e grupit ka pasur disa çështje në rendin e ditës. Një prej tyre ka qenë një prezantim në vijim të një komunikimi publik të bërë nga kryetari i partisë në mbledhjen e Asamblesë Kombëtare të 11 shtatorit. Ishte caktuar një kolege, ministrja Pirdeni, për të prezantuar një draft, një projekt për ngritjen dhe funksionimin e një Komisioni Etike në Partinë Socialiste, jo në grupin parlamentar”, u shpreh Balla.

Ai bëri të ditur se sot është prezantuar një projekt i parë mbi qëllimet dhe mënyrën e funksionimit të këtij komisioni, i cili lidhet drejtpërdrejt me prioritetet e mandatit të katërt të qeverisjes socialiste.

“Sot është prezantuar një projekt i parë i qëllimeve dhe i mënyrës së funksionimit të Komisionit të Etikës, i cili ndërlidhet ngushtë me atë që kryetari Rama ka prezantuar si një nga hapat e rëndësishëm që do të ndiqen gjatë këtij mandati të katërt. Ky hap ka të bëjë me goditjen e çdo forme të emërimeve nepotike, edhe kur ato tentojnë të justifikohen apo të mbulohen me petkun partiak”, tha Balla.

Sipas tij, mandati aktual është historik dhe kërkon standarde më të larta sjelljeje nga përfaqësuesit e Partisë Socialiste.

“Ky është një mandat historik. Shqiptarët na kanë besuar më 11 maj mandatin më të fortë, por njëkohësisht na kanë treguar edhe sesi duhet të sillemi me këtë mandat”, deklaroi ai.

Balla theksoi se krijimi i një vije të qartë etike është thelbësor për të ndarë përgjegjësinë politike nga interesat familjare.

“Krijimi i një vije të qartë etike ndarëse është i domosdoshëm. Të qenit deputet i Partisë Socialiste duhet të shoqërohet me një standard të qartë etik, ku të afërmit familjarë të deputetëve apo funksionarëve politikë të mos kenë asnjë lidhje apo përfitim nga administrata publike”, përfundoi Balla.

Burimi ATSH