Ministrja e Ekonomisë dhe Inovacionit, Delina Ibrahimaj, njoftoi se nga 1 janari Agjencia Kombëtare e Personelit (AKPA) do të funksionojë si portali i vetëm unik ku do të shpallen të gjitha vendet e lira të punës në administratën publike.

Sipas ministres Ibrahimaj, qëllimi i këtij portali është të lehtësojë procesin e aplikimit për të gjithë kandidatët, duke ofruar informacion të qartë dhe të përqendruar në një vend të vetëm.

Ky sistem nuk do të shërbejë vetëm për shërbimin civil, por do të përfshijë të gjitha strukturat dhe institucionet shtetërore.

“Ky hap do të rrisë transparencën dhe aksesin e barabartë në administratën publike, duke e bërë më të thjeshtë për të rinjtë dhe të gjithë qytetarët të aplikojnë për vendet e punës që u takojnë”, tha Ibrahimaj, gjatë takimit me të rinjtë e punësuar nga programet e nxitjes së punësimit.

/Burimi ATSH