Banka Botërore prezantoi sot në Tiranë, fillimin e projektit “Mjedis i Pastër dhe i Qëndrueshëm për Detin Blu” (CARE4BlueSea), një nismë e Qeverisë shqiptare për të mbrojtur bregdetin jugor, përmirësuar cilësinë e ujit dhe avancuar standardet mjedisore të Bashkimit Europian.

Drejtori Rajonal i Praktikës në Grupin e Bankës Botërore, Sameh Wahba, theksoi se projekti pasqyron një qasje të integruar, duke bashkëpunuar me sektorët e turizmit, ujit, menaxhimit të mbetjeve dhe përshtatjes me ndryshimet klimatike.

“Ne synojmë të adresojmë shkaqet e ndotjes dhe të sigurojmë lumenj dhe dete më të pastra, komunitete më të shëndetshme dhe ekonomi më të fortë”, shtoi ai.

Ministri i Mjedisit, Sofjan Jaupaj e konsideroi këtë nismë një hap të rëndësishëm drejt përmbushjes së kërkesave të BE-së për mjedisin dhe klimën.

Projekti do të përqendrohet te ndotja e lumit Vjosa dhe bregdetit të Vlorës, duke përfshirë: zgjerimin e mbulimit të grumbullimit të mbetjeve bashkiake nga 75% në 90%; ndërtimin e katër impianteve të reja të trajtimit të ujërave të ndotura; ofrimin e shërbimeve të përmirësuara sanitare për 40 500 banorë; nxitjen e ndryshimit të sjelljes për reduktimin e ndotjes nga plastika.

Ministria e Mjedisit dhe Agjencia Kombëtare Ujësjellës Kanalizimeve dhe Infrastrukturës së Mbetjeve (AKUK) do të udhëheqin zbatimin, ndërsa qeverisja vendore, sektori privat dhe shoqëria civile do të testojnë nisma inovative për grumbullimin e diferencuar të mbetjeve, reduktimin e plastikës dhe ndarjen e mbetjeve në burim.

Ky projekt synon të përmirësojë cilësinë e jetës për komunitetet lokale dhe të promovojë një ekonomi qarkulluese në përputhje me standardet e BE-së.

Marrë nga ATSH