Ministri i Mjedisit, Sofjan Jaupaj u shpreh sot se në projektligjin “Për gjuetinë”, Zonat e Mbrojtura janë të përjashtuara nga gjuetia.

Gjatë dëgjesës publike për projektligjin “Për gjuetinë” me njësitë e vetëqeverisjes vendore, në Komisionin për Burimet Natyrore, Infrastrukturën dhe Zhvillimin e Qëndrueshëm dhe Komisionin për Bujqësinë, Ushqimin dhe Zhvillimin Rural, Jaupaj tha se Ministria e Mjedisit ka një plan komunikimi me të gjitha bashkitë, shoqatat e gjuetarëve dhe organizatat mjedisore në lidhje me projektligjin “Për gjuetinë”.

“Të gjithë dëshirojnë që gjuetia të jetë një aktivitet i suksesshëm, me hapjen e saj pas 10 vitesh për shkak të moratoriumit, do të ketë një plan shumë të qartë në rritjen e kapaciteteve të njësive të qeverisjes vendore për mirëmenaxhimin e zonave të gjuetisë. Janë 15 mijë anëtarë në shoqatën e gjuetarëve në të gjithë vendin, që është një numër i konsiderueshëm”, tha Jaupaj.

Jaupaj shtoi se në lidhje me territorin, ka elementë teknikë që sqarohen nëpërmjet hartave, menaxherit të zonave etj.

“Çështja e mbikëqyrjes së zonave të menaxhimit, nëse nuk shihet me interes nga njësitë e qeverisjes vendore ato kanë lirshmërinë për të mos propozuar zona gjuetie. Në lidhje me inspektimin dhe kontrollin, inspektorët janë pranë njësive të qeverisjes vendore dhe kjo u bë me reformën territoriale të vitit 2016, për këtë arsye përcaktohen njësitë e qeverisjes vendore që bëjnë inspektimin e pyjeve”, pohoi Jaupaj.

Ministri Jaupaj tha menaxhimi i pyjeve është në tagër të bashkive, por në aktet nënligjore mund të shihen modalitete, sesi kjo gjë të rregullohet.

“Projektligji parashikon një seri hallkash në mënyrë që gjuetia të bëhet operacionale. Duke nisur nga miratimi i menaxhimit të zonave që bëhet me vendim të Këshillit të Ministrave, Planin Kombëtar të sezonit të gjuetisë që miratohet nga ministria, miratimi i sezonit të gjuetisë për secilën bashki, miratimi i listës së faunës etj”, tha Jaupaj.

Projektligji u hodh në votim dhe u miratua me shumicë votash.

Burimi ATSH