Nën koordinimin e Ministrisë së Bujqësisë dhe Zhvillimit Rural, ekipet e Drejtorisë së Ujitje–Kullimit në Lezhë, së bashku me emergjencat civile, Forcat e Armatosura dhe pushtetin vendor, vijojnë prej orësh punën në terren për të ndërhyrë në argjinaturën e Vainit, e cila u dëmtua sërish gjatë ditës së sotme.

Ministri i Bujqësisë dhe Zhvillimit Rural, Andis Salla, ndau pamje mbrëmjen e të hënës nga puna që po zhvillohet për forcimin e argjinaturës.

“Në Tale të Lezhës, ekipet e Drejtorisë së Ujitje-Kullimit, në bashkëpunim me emergjencat civile, Forcat e Armatosura dhe pushtetin vendor, vijon intensivisht punën për rehabilitimin e argjinaturës së dëmtuar, me qëllim minimizimin e dëmeve në tokat bujqësore dhe mbrojtjen e zonës”, shkruan Salla.

Reagimi i menjëhershëm dhe puna e koordinuar synojnë stabilizimin e situatës dhe garantimin e sigurisë së zonës, me qëllim mbrojtjen e tokave bujqësore.

Marrë nga ATSH