Ministri i Drejtësisë, Besfort Lamallari, priti në një takim zyrtar Lord Timpson, ministrin e Shtetit për Burgjet, Shërbimin e Provës dhe Uljen e Përsëritjes së Veprave Penale të Mbretërisë së Bashkuar.

Lamallari tha se, takimi u fokusua tek forcimi i bashkëpunimit dypalësh në fushën penale dhe sistemin penitenciar.

Ministri theksoi se marrëdhëniet shumë të mira mes Shqipërisë dhe Mbretërisë së Bashkuar përbëjnë një bazë solide për të thelluar më tej bashkëpunimin në fushën e sundimit të ligjit dhe forcimit të shtetit të së drejtës.

“Ne jemi të përkushtuar të avancojmë zbatimin e marrëveshjes për transferimin e të dënuarve, koordinimin e rasteve të ekstradimit dhe rritjen e efikasitetit të partneritetit gjyqësor. Marrëdhëniet shumë të mira mes dy vendeve tona janë një premisë e shkëlqyer për të thelluar më tej bashkëpunimin në fushën e sundimit të ligjit dhe forcimit të shtetit të së drejtës”, tha ai.

Ai ndaloi gjithashtu te qëndrimet diskriminuese që shpesh ushqehen ndaj komuniteteve të caktuara.

“Narrativat diskriminuese, përçarëse dhe frymëzuese të stereotipeve negative ndaj një kombësie të caktuar janë të padrejta, aspak korrekte dhe siç koha ka dëshmuar, në fund rezultojnë më së paku boshe apo dhe kundërproduktive”, u shpreh Lamallari, teksa vuri në dukje se ky takim është një hap i rëndësishëm drejt forcimit të partneritetit mes dy vendeve.

Burimi ATSH