Korça mirëpriti edicionin e parë të Festivalit Ndërkombëtar të Bandave Frymore “Air Beat Festival – Lulu Fest”.

Kryeministri Edi Rama ndau sot momente nga atmosfera e krijuar në Korçë, ku mbi 150 artistë nga Shqipëria, Kosova, Italia dhe Kroacia përcollën një atmosferë ndryshe.

Nga performancat në rrugë e sheshe, deri te koncerti madhështor përmbyllës, Rama vlerësoi se “festivali u bë një homazh për artin frymor dhe trashëgiminë muzikore korçare”.

Edicioni i parë i Festivalit Ndërkombëtar të Bandave Frymore “Air Beat Festival – Lulu Fest”, konsiderohet një tjetër dëshmi e gjallë e traditës dhe shpirtit kulturor që e bën Korçën unike.

Gjatë ditëve të festivalit, qyteti i Korçës u mbush me tingujt magjikë të orkestrave frymore me performanca të jashtëzakonshme që krijuan një atmosferë ndryshe.

“Lulu Fest” më shumë se një festival, konsiderohet një homazh për artin frymor, për traditën e pasur muzikore korçare dhe për mjeshtrit që e kanë dhënë këtij qyteti një tingull unik.

Festivali frymëzohet edhe nga banda historike “Vatra”, simbol i kulturës muzikore korçare mbi një shekull më parë, dhe një trashëgimi që sot po ringjallet përmes brezave të rinj.

/Marrë nga ATSH