Qeveria shqiptare ka miratuar në parim dy marrëveshje strategjike me Italinë, duke shënuar një hap të rëndësishëm në bashkëpunimin ndërkombëtar në sektorë kyç për zhvillimin social dhe ekonomik të vendit.

Marrëveshja e parë synon bashkëpunim strategjik në kujdesin shëndetësor, energjinë, mjedisin, industrinë e sigurisë dhe mbrojtjes, menaxhimin e migracionit, arsimin, inovacionin, diasporën, transformimin ekonomik dhe rritjen inteligjente. Kjo marrëveshje do të mundësojë shkëmbimin e ekspertizës, projekteve të përbashkëta dhe investimeve në fushat strategjike që ndikojnë në zhvillimin e qëndrueshëm të Shqipërisë.

Marrëveshja e dytë lidhet me zbatimin e projektit “Përparimi i shëndetit neonatal dhe të nënës në Shqipëri (ANMA) – AID 013307”, një iniciativë e përbashkët me Italinë që ka për qëllim përmirësimin e shëndetit të nënës dhe fëmijës në vend, forcimin e kapaciteteve spitalore dhe ngritjen e standardeve të kujdesit shëndetësor neonatal.

Të dy vendimet hyjnë në fuqi menjëherë pas miratimit dhe pritet të forcojnë marrëdhëniet bilaterale ndërmjet Shqipërisë dhe Italisë, duke rritur bashkëpunimin në projekte konkrete me ndikim të drejtpërdrejtë në jetën e qytetarëve.

Ky hap vjen gjithashtu si pjesë e strategjisë së Shqipërisë për transformim ekonomik dhe inovacion, duke përfshirë sektorë të rëndësishëm si arsimi, energjia e rinovueshme, mjedisi dhe mbrojtja e qytetarëve.

Burimi ATSH