Kryetari i Bashkisë së Korçës, Sotiraq Filo prit sot në një takim Drejtoren e Përgjithshme të Agjencisë Kombëtare të Turizmit, Zana Çela. Në fokus të takimit ishte vizioni për të ndërtuar një turizëm të qendrueshëm dhe gjithëpërfshirës.

Në një postim në rrjetet sociale, Filo nënvizon se gjatë takimit me Drejtoren e Përgjithshme të Agjencisë Kombëtare të Turizmit, u analizua sezoni turistik 2025, ku Korça u veçua për qasjen “All Senses” në planifikimin dhe organizimin e eventeve. Kjo qasje ka mundësuar ofrimin e përvojave të plota për vizitorët, duke përfshirë artin, gastronominë, natyrën dhe mikpritjen korçare.

“Korça po e ndërton me vizion dhe bashkëpunim të qëndrueshëm suksesin e saj turistik”, shkruan Filo.
“Nëpërmjet eventeve të kategorisë Art-Fest, si dhe shpërndarjes së aktiviteteve edhe në fshatrat turistike përreth, Korça ka arritur të jetë një nga 5 bashkitë me më shumë evente në vend gjatë sezonit 2025. Faleminderit Agjencisë Kombëtare të Turizmit dhe Ministrisë së Turizmit dhe Mjedisit për mbështetjen e vazhdueshme në promovimin digjital të Korçës në tregjet ndërkombëtare. Së bashku po e forcojmë turizmin si një shtyllë të rëndësishme të zhvillimit lokal”, përfundon Filo.

Burimi ATSH