Njësia e inspektorëve dhe ajo e ndihmësinspektorëve e Zyrës së Inspektorit të Lartë të Drejtësisë zhvilluan një trajnim dyditor mbi hetimin disiplinor dhe inspektimet, me fokus në fazat konkrete të procedimit dhe shkëmbimin e praktikave me homologët nga Italia dhe Spanja.

Trajnimi u realizua nga dy ekspertë ndërkombëtarë afatshkurtër, prokurorja María del Carmen de la Fuente Méndez, pjesë e Inspektoratit Spanjoll, dhe ish-prokurorja Annita Sorti, ish-anëtare e Inspektoratit të Përgjithshëm Italian, me mbështetjen e misionit “EU4Justice”.

Gjatë trajnimit u zhvilluan diskutime dhe punë në grupe mbi kriteret e përzgjedhjes së zyrave të prokurorive për inspektim, analizën e të dhënave paraprake, stokun e çështjeve, performancën e stafit dhe tendencat e ankesave. Po ashtu, u trajtuan përgatitja e mjeteve të inspektimit, komunikimi me zyrat objekt inspektimi përpara vizitës, si dhe planifikimi për identifikimin e fushave problematike.

Përvoja spanjolle dhe italiane u prezantua edhe në modelin e strukturimit të raportit të inspektimit, që përfshin gjetjet, provat, rëndësinë e çështjeve, si dhe dhënien e rekomandimeve afatshkurtra, afatmesme dhe afatgjata. Në këtë kuadër, u theksua rëndësia e identifikimit të praktikave më të mira, mekanizmave të ndjekjes dhe afateve të zbatimit, ndarjes së përgjegjësive, si edhe komunikimit të gjetjeve me transparencë, për të ruajtur besimin institucional.

Pjesa teorike e trajnimit u shoqërua me studime rastesh të bazuara në praktikat evropiane mbi inspektimet tematike dhe institucionale.

Burimi ATSH