Ministri i Bujqësisë dhe Zhvillimit Rural, Andis Salla, së bashku me mbi 60 fermerë, ekspertë, tregtarë inputesh, eksportues dhe përfaqësues të organizatës GIZ, zhvilluan sot një ditë të hapur fushore në fshatin Hoxhaj të Beratit.

Gjatë këtij aktiviteti u prezantua nga afër zbatimi i suksesshëm i kontrollit biologjik në prodhimin në serra, si pjesë e projektit të përbashkët “Zhvillimi i Qëndrueshëm Rural” (SRD).

Kontrolli biologjik është një praktikë inovative që kontribuon në rritjen e sigurisë ushqimore, përmirësimin e cilësisë së prodhimeve dhe reduktimin e përdorimit të pesticideve. Kjo qasje e qëndrueshme ndihmon në forcimin e konkurrueshmërisë së produkteve shqiptare në tregjet ndërkombëtare.

“Kjo praktikë novatore rrit sigurinë ushqimore, përmirëson cilësinë dhe ul përdorimin e pesticideve, duke e bërë prodhimin shqiptar më konkurrues dhe të gatshëm për tregjet ndërkombëtare”, bëri të ditur ministri Salla.

Përmes Skemës Kombëtare të Mbështetjes, nënvizoi ai, fermerët që aplikojnë kontrollet biologjike për dëmtuesit përfitojnë mbështetje shtesë financiare, duke u inkurajuar konkretisht për të adoptuar praktika bujqësore më efikase dhe të sigurta.

Burimi ATSH