Ministri i Kulturës, Turizmit dhe Sportit, Blendi Gonxhja zhvilloi sot një takim me zëvendësministrin e Kulturës dhe Turizmit të Republikës së Turqisë, Dr. Serdar Çam gjatë samitit ekonomik Shqipëri-Turqi.

Gonxhja tha se gjatë takimit u theksua rëndësia e forcimit të partneritetit ndërmjet dy vendeve në fushën e kulturës, turizmit dhe trashëgimisë.

Sipas Gonxhes, në panelin e përbashkët me temë “Turizmi i së nesërmes: Investime për një destinacion elitar”, u shkëmbyen ide dhe përvoja mbi nxitjen e bashkëpunimeve strategjike, promovimin e modeleve të qëndrueshme të zhvillimit turistik dhe rritjen e cilësisë së ofertës turistike në përputhje me standardet ndërkombëtare.

Gonxhja theksoi se “ky samit shënon një tjetër hap të rëndësishëm në konsolidimin e marrëdhënieve dypalëshe Shqipëri–Turqi dhe në krijimin e mundësive të reja për investime të ndërsjella që kontribuojnë në zhvillimin ekonomik dhe në afirmimin e turizmit si një urë bashkëpunimi ndërkulturor”.

Tirana mirëpriti sot forumin më të madh të investimeve Shqipëri-Turqi 2025, një ndër ngjarjet ekonomike më të rëndësishme të vitit, i cili u organizua nga Agjencia Shqiptare e Zhvillimit të Investimeve (AIDA) në bashkëpunim me MÜSİAD Albania, në ambientet e Pallatit të Kongreseve.

Ky forum i nivelit të lartë mblodhi mbi 1500 pjesëmarrës nga të dy vendet, përfshirë përfaqësues të lartë qeveritarë, investitorë, sipërmarrës dhe aktorë të zhvillimit ekonomik, me qëllim forcimin e bashkëpunimit dypalësh dhe nxitjen e investimeve të ndërsjella.

Burimi ATSH