Zëvendëskryeministrja dhe njëherësh ministre e Infrastrukturës dhe Energjisë, Belinda Balluku, në forumin e investimeve Shqipëri-Turqi që po zhvillohet sot në Tiranë, ku merr pjesë edhe zëvendëspresidenti i Turqisë, Cevdet Yilmaz, theksoi se marrëdhëniet mes dy vendeve janë ndërtuar mbi bashkëpunim të ngushtë dhe besim të fortë, duke i hapur njëra-tjetrës dyert e mundësive për investime dhe zhvillim.

Ajo nënvizoi se shqiptarët dhe turqit kanë ecur krah për krah dhe ky forum është një hap i rëndësishëm për të fuqizuar më tej këtë partneritet.

Shqipëria, pavarësisht sipërfaqes së vogël prej 28 mijë kilometrash katrorë, tha ajo, ofron një treg dinamik dhe shumë mundësi investimi në sektorë të ndryshëm si turizmi, energjia, teknologjia, bujqësia dhe industria.

Balluku theksoi se vendi është një destinacion i ri për bizneset, me një kuadër fiskal shumë të favorshëm që përfshin përjashtime dhe lehtësira tatimore për investitorët.

Në sektorin e teknologjisë dhe prodhimit të softuerit, tha ajo, aplikohet tatimi mbi fitimin prej vetëm 5% ose përjashtim 15-vjeçar për bizneset që operojnë në parqet teknologjike dhe shkencore. Në bujqësi dhe agroturizëm, shtoi Balluku, tatimi është 5% deri në vitin 2029, ndërsa në industrinë automotive aplikohet po ashtu një normë fitimi prej 5% deri në fund të vitit 2029.

Në sektorin e turizmit, nënvizoi më tej, janë bërë përpjekje serioze për të ndjekur shembullin e Turqisë, duke inkurajuar zhvillimin e markave dhe brandeve të njohura ndërkombëtare. Sipërmarrjet turke që investojnë në Shqipëri dhe sjellin brande me pesë yje përjashtohen nga tatimi mbi fitimin dhe taksat vendore për 10 vite.

Po ashtu, kinematografia dhe investimet në fondet e pensioneve janë të përjashtuara plotësisht nga taksat, duke nxitur bashkëpunimin në sektorë kulturorë dhe kreativë.

Balluku e përshkroi Shqipërinë si një vend me transparencë dhe drejtësi në sistemin fiskal, ku investitorët turq janë tashmë një “armatë në rritje” që kanë siguruar përfitime të mëdha në fusha si energjia, mineralet, ndërtimi, telekomunikacioni, prodhimi dhe turizmi.

“Edhe vetë presidentja e Komisionit Europian, Ursula von der Leyen, pak ditë më parë u bëri thirrje të gjithë investitorëve europianë që sot është koha për të investuar në Shqipëri”, nënvizoi Balluku.

Duke u ndalur te teknologjia ushtarake, Balluku tha se Shqipëria si konsumatore e hershme e mallrave turke, i përket asaj pjese të madhe të botës që është magjepsur nga dronët “Bajraktar”, përforcimi më i fundit i ushtrisë sonë.

Ajo deklaroi se përdorimi i dronëve “Bajraktar” në Shqipëri nuk kufizohet vetëm në përdorim ushtarak, por këto pajisje teknologjike përdoren edhe në sektorë të tjerë si emergjenca civile, bujqësia, infrastruktura kritike dhe turizmi.

Balluku ftoi investitorët turq që të shfrytëzojnë mundësitë që ofron Shqipëria dhe të bëhen pjesë e zhvillimit ekonomik të vendit, duke e kthyer Shqipërinë në një destinacion të preferuar për investimet strategjike në rajon.

Burimi ATSH