Ministri i Mjedisit, Sofjan Jaupaj tha sot se impiantet e kompostimit të investuara në disa bashki kanë dalë të suksesshme sepse prodhohet pleh për bujqësinë.

Gjatë prezantimit në Komisionin e Ekonomisë, Punësimit dhe Financave të projektligjit “Për menaxhimin e integruar të mbetjeve”, Jaupaj u shpreh se shumica e bashkive në Republikën e Shqipërisë janë bujqësore dhe pjesa e impianteve të kompostimit duhet të jetë e detyrueshme për bashkitë.

Jaupaj bëri të ditur se impiante kompostimi janë ndërtuar në bashkinë e Roskovecit, Cërrikut dhe për tre javë hapet qendra e kompostimit në Përmet, Lezhë etj. Një pjesë e mirë e bashkive po e parashikojnë planet e tyre ngritjen e qendrës së kompostimit të mbetjeve.

Duke iu drejtuar deputetëve në komision, Jaupaj tha se në diskutime me disa kryetarë bashkish një pjesë e mirë e tyre po e parashikojnë se është një investim që nuk kërkon një kosto të konsiderueshme përveç bashkive të mëdha që duhet ta kenë impiantin e kompostimit shumë më të madh dhe mund ta përballojnë nga buxheti.

Ne, vijoi Jaupaj, i kemi të parashikuara në 3 programe investimi si me Bashkimin Evropian, edhe me KFW, edhe projekti që kemi me GIZ, që gjitha investimet në menaxhimin e mbetjeve për bashkitë duhet të kenë patjetër komponentin e kompostimit, pasi me shumë të drejtë ato që quhen mbetjet e gjelbra janë edhe ndotësit kryesorë në zonat rurale.

“Është bërë taksative nga Ministria e Mjedisit që të gjitha investimet sa i takon fushës së menaxhimit të mbetjeve të përfshijnë kompostimin sepse 75% e bashkive kanë prodhim bujqësor. Deri në 2028 do të kemi infrastrukturën e mbetjeve në të gjithë territorin të ngritur ku përfshihen edhe kompostimi”, tha Jaupaj.

Procesi i kompostimit të mbetjeve përfshin disa faza, që nga mbledhja dhe ruajtja e materialit organik deri në fazën përfundimtare të dekompozimit.

Burimi ATSH