Banka e Shqipërisë çeli sot zyrtarisht punën për implementimin e TIPS Clone, sistemi i ri për pagesa të menjëhershme 24/7 që synon të transformojë infrastrukturën e pagesave në vend.

Projekti realizohet në bashkëpunim me Bankën e Italisë dhe është miratuar nga Banka Qendrore Evropiane (ECB). Shqipëria është një nga pesë vendet e Ballkanit që do të aplikojnë këtë platformë të bazuar në sistemin TIPS të BE-së, duke ofruar pagesa në sekonda, çdo ditë të vitit.

Në takimin teknik që u zhvillua so në Tiranë morën pjesë bankat tregtare, institucionet e parasë elektronike dhe ekspertë të sektorit financiar, duke shënuar një hap konkret drejt modernizimit financiar dhe integrimit evropian.

BSH- ja bën të ditur se, në kuadër të takimit u organizua edhe një workshop teknik me temën: “Shërbimet e ndërlidhjes dhe shërbimet shtesë për pagesat e shpejta”, me pjesëmarrjen e kompanisë Nexi, një nga dy entitetet e certifikuara nga Banka Qendrore Evropiane për ofrimin e shërbimeve të ndërlidhjes për sistemin TIPS.

Diskutimet u fokusuan në integrimin teknologjik, risitë në përpunimin e pagesave dhe shërbimet shtesë që do të ndihmojnë Shqipërinë të arrijë një infrastrukturë moderne, të krahasueshme me atë të vendeve të BE-së.

TIPS Clone pritet të transformojë sistemin e pagesave në Shqipëri, duke mundësuar një ekonomi më të shpejtë, më transparente dhe më të aksesueshme për qytetarët dhe bizneset. Ky është një hap domethënës drejt afrimit të Shqipërisë me standardet financiare evropiane dhe drejt ndërtimit të një të ardhmeje më digjitale.

Burimi ATSH