Transporti publik për qytetarët e Elbasanit dhe Vlorës do të përmirësohet ndjeshëm falë një projekti që do të zbatohet me mbështetjen e Shoqërisë Gjermane për Bashkëpunim Ndërkombëtar (GIZ).

Falë teknologjive të reja, si ndjekja e autobusëve në kohë reale dhe krijimi i orareve digjitale që mund të shikohen lehtësisht në telefon, qytetarët do të dinë saktësisht kur vjen autobusi dhe do të mund të planifikojnë më mirë udhëtimet e tyre.

Shoqëria Gjermane për Bashkëpunim Ndërkombëtar (GIZ) nënshkroi së fundmi një marrëveshje me bashkinë e Elbasanit për të përmirësuar shërbimin e rrjetit të autobusëve, ku ndër të tjera parashikohet edhe riorganizimi i tyre, duke siguruar mbulim më të mirë, efikasitet dhe aksesueshmëri për të gjithë përdoruesit.

Po ashtu ekspertë të GIZ zhvilluan takime edhe në bashkinë e Vlorës.

Projekti mundëson përdorimin e teknologjive që lejojnë ndjekjen e autobusëve në kohë reale dhe krijimin e orareve digjitale që qytetarët mund t’i shikojnë në telefon.

“Zbatimi i projektit hedh bazat për përmirësimin e shërbimit, duke krijuar një përvojë më të mirë për pasagjerët e autobusëve dhe duke kontribuar për qytete më të jetueshme”, bën të ditur GIZ.

Burimi ATSH