Ministria e Drejtësisë vijon të ofrojë ndihmë juridike falas për çdo qytetar, veçanërisht për ata në nevojë.

Ministri i Drejtësisë, Ulsi Manja tha sot se “gjatë periudhës janar–korrik 2025, mbi 3,700 qytetarë kanë përfituar ndihmë juridike falas nga Ministria e Drejtësisë, duke u qëndruar pranë atyre që kanë më shumë nevojë”.

“Me përkushtim të palëkundur, vijojmë të garantojmë dinjitet dhe akses të barabartë në drejtësi për çdo qytetar”, tha Manja.

Ndihma juridike falas garanton mbrojtje dhe akses të barabartë për të gjithë qytetarët në sistemin e drejtësisë. Ky shërbim është i pranishëm në të gjithë Shqipërinë për të gjitha ata që i nevojitet ndihmë juridike falas apo avokat falas për proces gjyqësor.

Qytetarët duhet të paraqiten pranë 20 qendrave të shërbimit të ndihmës juridike parësore (në Tiranë, Lushnjë, Durrës, Lezhë, Pogradec, Vlorë, Dibër, Kukës, Korçë, Berat, Elbasan, Shkodër, Tropojë, Përmet, Pukë, Mat, Kavajë, Kurbin, Gjirokastër dhe Fier).

Nga kjo ndihmë përfitojnë qytetarët pa të ardhura dhe pasuri të mjaftueshme, viktimat e dhunës në familje, viktimat e abuzuar seksualisht, viktimat e trafikimit të qenieve njerëzore, viktimat e mitur, të miturit në konflikt me ligjin si dhe fëmijët të cilët jetojnë në institucionet e përkujdesjes shoqërore.

Gjithashtu ndihmë juridike iu ofrohet edhe personave që përfitojnë nga pagesa për aftësinë e kufizuar, personat që përfitojnë nga statusi i të verbrit si dhe personat, të cilët janë përfitues të skemave të mbrojtjes sociale, etj