Sektori i turizmit ka dhënë kontribut në rritjen e besimit të biznesit dhe konsumatorit në ekonominë e vendit gjatë muajit korrik 2025.

Treguesi i Ndjesisë Ekonomike (TNE) u rrit me 2,9 pikë në muajin korrik, duke qëndruar rreth 9 pikë mbi mesataren afatgjatë, sipas të dhënave më të fundit të publikuara nga Banka e Shqipërisë.

Rritja u udhëhoq kryesisht nga përmirësimi i ndjeshëm i besimit në sektorin e shërbimeve dhe të tregtisë, ndërsa industria dha gjithashtu një kontribut pozitiv, megjithëse në një masë më të vogël.

Nga ana tjetër, rënia e besimit në ndërtim dhe rënia e besimit konsumator ndikuan negativisht në treguesin e përgjithshëm.

Industria ruan trendin pozitiv, por me sinjale për ulje të prodhimit

Sipas BSH-së, Treguesi i Besimit në Industri (TBI) u rrit me 0,8 pikë përqindje, duke qëndruar 6,5 pikë mbi mesataren historike. Rritja erdhi kryesisht si pasojë e pritjeve optimiste për kontratat e reja, megjithëse vlerësimi për prodhimin aktual u ul. Pritjet për çmimet në industri vijuan tendencën rënëse.

Rënie e lehtë në ndërtim, por besimi mbetet mbi mesataren

Treguesi i Besimit në Ndërtim (TBN) ra me 1 pikë përqindje në korrik, por mbeti ende 14,4 pikë përqindje mbi mesataren historike. Kjo rënie u ndikua nga pritje më të ulëta për aktivitetin ndërtues dhe porositë kontraktuese në të ardhmen. Gjithashtu, pritjet për çmimet janë rishikuar në ulje.

Sektori i shërbimeve në nivelin më të lartë të vitit

Rritja më e madhe u regjistrua në sektorin e shërbimeve, ku treguesi i besimit (TBSH) u rrit me 6,2 pikë përqindje duke arritur nivelin më të lartë për vitin 2025 dhe qëndruar 17,4 pikë mbi mesataren historike. Përmirësimi u ndihmua nga vlerësime më pozitive për aktivitetin aktual dhe kërkesën. Pritjet për çmimet në këtë sektor u rishikuan lehtë për poshtë.

Vrojtimi i BSH-së raporton optimizëm në tregti, veçanërisht për punësimin

Treguesi i besimit në tregti (TBT) u rrit me 3,3 pikë përqindje, duke arritur një nivel 7,5 pikë mbi mesataren historike. Rritja u nxit kryesisht nga pritjet për rritje të punësimit në muajt e ardhshëm. Vlerësimi i përgjithshëm për ecurinë aktuale të biznesit ndikoi gjithashtu pozitivisht.

BSH bëntë ditur se, ndryshe nga bizneset, treguesi i besimit konsumator (TBK) shënoi një rënie prej 0,9 pikësh përqindje, edhe pse vazhdon të qëndrojë mbi mesataren historike dhe pranë niveleve të vitit 2024. Rënia u ndikua kryesisht nga ulja e vlerësimit për blerjet e mëdha aktuale. Megjithatë, pritjet për blerje të mëdha në të ardhmen dhe përmirësimi i pritjeve për gjendjen financiare dhanë një efekt zbutës.