Këshilli i Ministrave miratoi sot skemën e veçantë të Garancisë Shtetërore të huas për garantimin e huamarrjes së subjekteve në sektorin e bujqësisë.

Me një vlerë prej 3 miliardë lekë skema e veçantë e garancisë shtetërore të huas do të lëshohet në favor të disa bankave tregtare të nivelit të dytë.

Konkretisht bankat e parashikuara në këtë vendim janë: Banka Raiffeisen, sh.a.; Banka e Bashkuar e Shqipërisë, sh.a.; Banka Kombëtare Tregtare, sh.a.; Banka Tirana, sh.a.; Banka Intesa Sanpaolo Albania, sh.a.; Banka Procredit, sh.a.; Banka Amerikane e Investimeve, sh.a.; Banka e Parë e Investimeve Albania, sh.a.; Banka Credins, sh.a.;
Banka OTP Albania, sh.a.; Banka Union, sh.a.

Ministri i Financave autorizohet për nënshkrimin e marrëveshjes së garancisë me bankat tregtare të nivelit të dytë.

Ndërkohë ngarkohen Agjencia për Menaxhimin e Garancive dhe Kredive të Pakthyera dhe Agjencia për Zhvillim Bujqësor dhe Rural, në përputhje me parashikimet ligjore në fuqi, për ndjekjen dhe administrimin e kësaj skeme garancie.

Ministria e Financave dhe Ministria e Bujqësisë dhe Zhvillimit Rural do të ndjekin procedurat e nevojshme për zbatimin e këtij vendimi.