Kërkesa për kredi e bizneseve parashikohet në rritje, edhe për 3-mujorin e tretë 2025, pavarësisht qëllimit të përdorimit, ndërsa kërkesa për kredi nga individët pritet të bjerë, kryesisht në kreditë për blerje banesash.

Banka e Shqipërisë publikoi të dhënat e vrojtimit për aktivitetin kreditues, në tremujorin e dytë 2025, ku evidenton se kërkesa e lartë për kredi u raportua nga të gjitha kategoritë e biznesit si për qëllim financimi dhe për investime.

Sipas BSH-së, faktorët që nxitën kërkesën për kredi ishin nevojat më të larta për financim konsumi dhe për blerje banesash.

Ndërsa kërkesa për kredi me qëllim mbulimin e nevojave afatshkurtra për likuiditet u raportua në nivele të ulëta.

Vrojtimi evidenton se edhe gjatë 3-mujorit të dytë të 2025, bankat ndoqën politika të ngjashme kreditimi për bizneset, standarde, kushte dhe terma kreditimi të njëjta.

Ndërkohë, u miratua një raport kredish i ngjashëm me tremujorin e parë.

Sa i takon vrojtimit të kreditimit për individët, kuadri kreditues për këtë segment mbeti pothuajse i pandryshuar. “Standardet, kushtet dhe termat e kreditimi mbeten të qëndrueshme”, thekson BSH-ja.

BSH konstaton se, në 3- mujorin e dytë 2025, një shkallë më e lartë miratimi kredish për individët, erdhi si pasojë e vlerësimeve më të mira të bankave për cilësinë e kredimarrësve dhe historikut të tyre në tregun e punës.

Burimi ATSH