Këshilli i Ministrave miratoi sot vendimin për procesin e organizimit të institucioneve me funksione inspektimi në juridiksionin e pushtetit ekzekutiv të qeverisjes qendrore, në fushën e zbatimit të ligjit “Për inspektimin në Republikën e Shqipërisë”.

Në vendimin e qeverisë thuhet se institucionet që i nënshtrohen procesit të riorganizimit janë Agjencia Kombëtare e Barnave dhe Pajisjeve Mjekësore; Agjencia Kombëtare e Mjedisit; Agjencia Kombëtare e Pyjeve; Agjencia Kombëtare e Zonave të Mbrojtura; Autoriteti Kombëtar i Veterinarisë dhe Mbrojtjes së Bimëve; Autoriteti Kombëtar i Ushqimit; Drejtoria e Përgjithshme e Arkivave; Drejtoria e Shërbimeve të Peshkimit dhe Akuakulturës; Inspektorati Kombëtar i Mbrojtjes së Territorit; Inspektorati Kombëtar i Mbrojtjes së Trashëgimisë Kulturore; Inspektorati Shtetëror Shëndetësor; Inspektorati Shtetëror i Punës dhe Shërbimeve Shoqërore; Inspektorati Shtetëror i Mbikëqyrjes së Tregut dhe Instituti i Shëndetit Publik.

Funksionet inspektuese të Agjencisë Kombëtare të Arsimit Parauniversitar dhe të Agjencisë Kombëtare të Bregdetit transferohen në inspektoratet e reja qendrore, që do të krijohen sipas fushave të inspektimit, që mbulojnë ministritë përgjegjëse dhe sipas parimeve të ligjit “Për inspektimin në Republikën e Shqipërisë”.

Për ndjekjen dhe zbatimin e vendimit ngarkohen Ministria e Bujqësisë dhe Zhvillimit Rural, Ministria e Shëndetësisë dhe Mbrojtjes Sociale, Ministria e Arsimit dhe Sportit, Ministria e Ekonomisë, Kulturës dhe Inovacionit, Ministria e Brendshme, Ministria e Turizmit dhe Mjedisit dhe institucionet e përcaktuara në pikat 1 dhe 2.

Ky vendim hyn në fuqi pas botimit në “Fletoren zyrtare”.

Burimi ATSH