Kryegjyshi botëror, Haxhi Dede Baba, Edmond Brahimaj, përcolli një mesazh uniteti dhe bashkimi për të gjithë besimtarët, në prag të Ditës së Ashures.

Haxhi Dede Baba Edmond Brahimaj u lut për paqe, në një kohë kur, siç u shpreh ai vetë, vatrat e luftërave në botë janë të shumta.

Më 8 korrik, besimtarët bektashinj kremtojnë Ditën e Ashures, një nga ditët më të shenjta dhe domethënëse për komunitetin e tyre. Ashurja, është një rit tradicional bektashian, që përkujton me veneracion heroin e Qerbelasë, Imam Hysenin dhe 72 dëshmorët e tij, që u vetëflijuan, gjer në sakrificën njerëzore, sublime, për mbrojtjen e idealeve të jetës.

Për dhjetë ditë, bektashinjtë agjërojnë dhe në përfundim të agjërimit besimtarët pinë ujin e jetës, sherbetin dhe mbas kësaj vihet ashurja në zjarr dhe vazhdon të nesërmen “Dita e Ashures”.