Agroturizmi “Hajdar Kuçi” sjell konceptin e njohur “nga toka në tavolinë”, duke ofruar një përvojë unike për çdo vizitor që kërkon qetësi, natyrë dhe shije të vërteta shqiptare.

Ministrja e Bujqësisë dhe Zhvillimit Rural, Anila Denaj ndau në rrjetet sociale shembullin e agroturizmit “Hajdar Kuçi”, që ndodhet jo shumë minuta larg kryeqytetit, në fshatin Marikaj, mes Tiranës dhe Durrësit.

“Agroturizmi Hajdar Kuçi sjell në tryezë produkte autentike “Made in Albania”, përmes konceptit “nga toka në tavolinë”, duke ofruar një përvojë unike për çdo vizitor që kërkon qetësi, natyrë dhe shije të vërteta shqiptare. Hajdari, agronom në profesion, dhe bashkëshortja e tij Lindita, janë zemra e këtij agroturizmi, ku çdo detaj, nga mikpritja te prodhimi, reflekton dashurinë për tokën dhe përkushtimin ndaj traditës. Me vreshta, ullinj, sera me perime të stinës, ara me shegë, bletë dhe gjedhë, ferma është një shembull se si natyra dhe gastronomia tradicionale bashkëjetojnë në harmoni”, theksoi Denaj.

Denaj u shpreh se “përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, mund të përfitoni financim me normë interesi vetëm 2% dhe mbulim kolateral deri në 70%, ndërsa për zonat malore mbështetja është edhe më e madhe falë Paketës së Maleve”.

Burimi ATSH