Në mjediset e Bibliotekës “Thimi Mitko”, në Korçë u zhvillua një tryezë bashkëpunimi në kuadër të programit Zero City Lab, një nismë që synon të sjellë aktorët lokalë më afër për zgjidhje të qëndrueshme në menaxhimin e mbetjeve dhe ekonominë qarkulluese.

Në fokus ishte bashkëpunimi mes institucioneve vendore, universiteteve, bizneseve dhe shoqërisë civile për të adresuar sfida të përbashkëta në sektorë si bujqësia, turizmi dhe tekstilet.

Kryetari i bashkisë së Korçës, Sotiraq Filo përmes një postimi në rrjetet sociale tha se, së shpejti hapet thirrja për grante, ku bizneset vendore do të kenë mundësi të aplikojnë për mbështetje deri në 50 mijë euro, për ide që sjellin ndikim pozitiv për mjedisin dhe komunitetin.

“Bashkia e Korçës mbështet çdo iniciativë që nxit zhvillim të qëndrueshëm dhe rritje ekonomike përmes risive lokale”, u shpreh kryebashkiaku Filo.