Mbi 50 mijë fermerë kanë aplikuar deri tani, që nga dita e hapjes së thirrjes më 14 prill, për masën e mbështetjes me naftë, për kryerjen e punimeve të mekanizuara në bujqësi.

Agjencia për Zhvillim Bujqësor dhe Rural bëri të ditur se qëllimi i kësaj mase është lehtësimi i kostove për fermerët dhe rritja e rendimentit të prodhimit.

Sipas AZHBR-së, interesi i fermerëve për të përfituar nga Skema Kombëtare është tejet i lartë dhe kjo falë mbështetjes financiare për këtë sektor, që ka qenë çdo vit në dispozicion të tyre.

Skema e mbështetjes për naftë falas, vijon për të pestin vit radhazi. Edhe këtë vit nafta do të shpërndahet nëpërmjet pagesës në lekë për hektar, në llogarinë bankare të çdo fermeri aplikues, e përllogaritur në bazë të normativave të konsumit të naftës, për sipërfaqe më të mëdha se 1 hektar.

Fermerët me sipërfaqe më të mëdha se 10 hektarë, do të përfitojnë 50% të masës së financimit për çdo hektar të mbjellë me kultura bujqësore.

Aplikuesit në grupimet e Bashkimit të Fermerëve, do të përfitojnë të parët dhe secili prej tyre do të marrë në llogari të veçantë masën e financimit në nivelin maksimal.

Aplikimet kryhen on-line përmes portalit e-Albania në linkun: https://e-albania.al/eAlbaniaServices/UseService.aspx… ose pranë Agropikave dhe zyrave të ekstensionit bujqësor deri në datë 30 maj 2025 dhe më pas do të kalojnë në filtrin e verifikimit të aplikimeve.

Burimi ATSH