Zv/kryeministrja, njëherësh drejtuesja politike e PS në qarkun e Fierit, Belinda Balluku, u shpreh sot se PS ka aktualisht 65% të votave dhe mandatin e 12-të në qarkun e Fierit.

Në një intervistë televizive, Balluku foli lidhur me procesin e votimit, të numërimit dhe të rezultateve të deritanishme nga zgjedhjet e 11 majit.

“Mandati i 10 ka qenë i pritshëm, kemi qenë të bindur që do arrijmë mandatin e 11, ndërkohë që për mandatin e 12, do thoja që ti planifikon dhe ëndërron, më është dëgjuar dëshira kësaj radhe”, tha ajo.

E pyetur nëse kanë besim për një mandat të 13, Balluku tha se, “mandati i 12 është i brishtë, jemi duke pritur numërimin e secilës kuti. Për shkak të këtij procesi zgjedhor duhet të them që mandatet janë shumë të brishta. Çdo mandat që ne marrim më tepër vështirësohet për ne. Për shkak të përqindjeve, ne kemi rreth 65% dhe PD ka nën 25%, ne e kemi mandatin e 12, por do të gëzoja dhe deklaroja për këtë mandat vetëm në mbyllje të kutisë së fundit. Ndërkohë për mandatin e 13, janë të mirëpritur të gjithë mandatet edhe 14”.

Duke folur për opozitën, Balluku tha se, “PD zgjodhi që të bëjë një fushatë zero në terren, vetëm sharje, ofendime në facebook, çuditërisht vendosi të bullizonin femra në Fier. Ata kanë bazuar fushatën në sharjen e grave në këtë vend”.

Burimi ATSH