Kryetarja e Kuvendit, njëherësh bashkëdrejtuese politike e Partisë Socialiste për Tiranën, Elisa Spiropali deklaroi se, fakti që sot Shqipëria është shumë pranë anëtarësimit në Bashkimin Evropian është atribut i kësaj force politike.

Në një intervistë televizive, Spiropali u shpreh sot se procesi i integrimit në BE “është përshpejtuar, përforcuar e siguruar nga Edi Rama dhe PS-ja”.

Ndërsa kreun e Partisë Demokratike Sali Berisha, Spiropali e quajti një të “pandehur që po lufton hapur me organet e drejtësisë” dhe “nongrata në dy shtete partnere strategjike”.

Po ashtu, Spiropali rreshtoi 4 momente që kanë e larguar procesin e integrimit në BE.

“Shanset historike i kanë humbur për shkak të politikave të mbrapshta. Shqipëria në ’96-ën ishte pranë dhe shumë pranë këtyre proceseve, u vodhën zgjedhjet. Në ’97-ën lam nam ndërkombëtar me një luftë civile e cila u shkaktua pikërisht nga kjo lloj politike. Në 2008-ën u hodh në erë një fshat i tërë, u vranë 26 persona dhe desh humbën procesin e anëtarësimit në NATO. Në 2011-ën u vranë 4 qytetarë të pafajshëm në bulevard nga armët e shtetit, e të tjera, që e kanë larguar këtë proces”, tha Spiropali.

Spiropali shtoi se Partia Socialiste ka objektiv minimal ka 74 mandate në 11 maj. “74 mandate është dyshemeja, priten edhe votat e diasporës ku rezultati do të jetë edhe më i thellë në favor të PS.”