Kryeministri Edi Rama, njëherësh kryetar i Partisë Socialiste do të zhvillojë në 13 prill një takim me shqiptarët në Milano, Itali, në vijim të turit të takimeve me diasporën.

Përmes një postimi në rrjetet sociale, Rama bëri të ditur se takimi me shqiptarët e Italisë do të zhvillohet në 13 prill, në orën 15:00 në “Centro Congressi Malpensia Fiere”.

Kjo do të jetë hera e dytë që kryeministri zhvillon takime me shqiptarët e Italisë në Milano në kuadër të turit të diasporës.

Turin e bashkëbisedimit me diasporën, Kryeministri Rama e ka nisur në 12 maj 2024 nga Athina, Greqi, për të vijuar më pas në 26 maj në Milano, Itali, dy shtetet me numrin më të lartë të emigrantëve shqiptarë.

Në 26 tetor 2024, Kryeministri Rama zhvilloi po ashtu takimin në Nju-Jork me shqiptarët e Amerikës, të cilëve u kërkoi votën në zgjedhjet e 11 majit për të vijuar punën drejt misionit për ta bërë Shqipërinë vend anëtar në BE.

Në 3 nëntor 2024 Rama u takua me shqiptarët në Selanik, ndërsa në 24 nëntor 2024 me shqiptarët në Londër.

Në mars 2025, Kryeministri iu rikthye takimeve me shqiptarët e Greqisë, duke u ndalur në 29 mars në Kretë dhe në 30 mars në Athinë.

Burimi ATSH