Në qytetin e Beratit është drejt përfundimit parku rekreativ “Dua të luaj”, duke u siguruar qytetarëve dhe turistëve një hapësirë çlodhëse dhe rekreative për aktivitete sportive.

Kryeministri Edi Rama ndau në rrjetet sociale momente nga puna që po kryhet për ndërtimin e këtij parku, një projekt i Fondit Shqiptar të Zhvillimit në kuadër të programit “Dua të luaj”, që po zhvillohet në disa bashki.

“Drejt përfundimit parku “Dua të Luaj” në Berat, një hapësirë rekreative për të gjithë qytetarët, por dhe për turistët e shumtë që do të ndalen në qytetin e UNESCO-s”, shkruan Rama.
Projekti “Dua të luaj” synon rritjen e mirëqenies së komunitetit dhe dhënien e mundësisë për zhvillimin motorik të brezave të rinj.

Ky projekt konsiston në ndërtimin e këndeve që mundësojnë zhvillim të aftësive motorike të fëmijëve të moshave të ndryshme dhe që aksesohet nga të gjithë; rimodelimin apo përmirësimin e këndeve të lojërave ekzistues të degraduar, me qëllim rritjen e aksesit dhe bashkëveprimin me elementet natyrorë; si dhe krijimin e infrastrukturave të cilat ndikojnë në sigurinë për grupmoshat 0-14 vjeç, si p.sh., sinjalistikë në infrastrukturën rrugore, barriera dhe hapësira urbane rrethuese në këndet ekzistuese, etj.

ATSH