Kryeministri Edi Rama vlerësoi sot nënshkrimin e marrëveshjes mes “TEDA Tiranë”, Zona e Lirë Ekonomike e Bashkisë së Tiranës, dhe kompanisë izraelite “H.A.P.I Advanced Technologies LTD”, në krijimin e bazës më të madhe të të dhënave dixhitale të rajonit, që do të ofrojë një platformë shumë tërheqëse për kompani të mëdha në fushën e teknologjisë dixhitale.

Në ceremoninë e organizuar me rastin e nënshkrimit të kësaj marrëveshjeje, Rama e cilësoi këtë si “një investim të rëndësishëm për teknologjinë digjitale”.

Kryeministri theksoi se “TEDA Tiranë” është një projekt strategjik për të nxitur investimet në teknologji dhe industri, duke ofruar lehtësi për investitorët në sektorë si teknologjia, automotive, inovacioni dhe prodhimi.

“Investimi që do të realizohet nga kompania izraelite në Zonën e Lirë Ekonomike të Tiranës është një investim strategjik i një rëndësie shumë të veçantë. Bëhet fjalë për dhjetëra milionë euro investim për të krijuar një bankë të dhënash dixhitale, e cila do të jetë në harkun e 18 muajve pas marrjes së lejes së zhvillimit, baza më e madhe e të dhënave dixhitale të rajonit tonë”, tha Rama.

Kryeministri theksoi se investimi do të ofrojë një platformë shumë tërheqëse për kompani të mëdha në fushën e teknologjisë dixhitale, përkatësisht në zhvillimin e Inteligjencës Artificiale përtej hapësirave të zhvillimit në funksion të industrisë dhe në funksion të administrimit tërësor të organizmit të shtetit.

“Ky investim do të krijojë mundësi të jashtëzakonshme për të gjithë të rinjtë brenda dhe jashtë vendit, për të pasur një punë të shumëmirëpaguar në Tiranë. Filozofia e kompanisë në tërësi e kompanive që zhvillojnë këto investime”, shtoi ai.

Ndërkohë, Rama vuri në dukje se teknologjia dixhitale nuk është gjëkundi e lidhur me koston e krahut të punës, përkundrazi është e lidhur me cilësinë e krahut të punës.

Në këtë aspekt, Kryeministri nënvizoi se pagat nuk bëjnë asnjë dallim.

“Përkundrazi nuk është çështja sa duhet të paguhet forca e punës, por sa cilësore do të jetë forca e punës ky është një lajm shumë i mirë për të gjithë të rinjtë që janë të investuar në dije në fushën e teknologjisë”, tha Rama.

Burimi ATSH