Inspektori i Lartë i Drejtësisë, Artur Metani mikpriti sot në ambientet e institucionit të ILD-së klasën e vitit 2024-2025 të programit LEAD Albania, të Fondacionit Shqiptaro-Amerikan për Zhvillim.

Në nisje të bashkëbisedimit, Inspektori i Lartë i Drejtësisë i njohu pjesëmarrësit me rolin dhe funksionet e ILD-së, si institucioni përgjegjës për verifikimin e ankesave, hetimin e shkeljeve disiplinore dhe fillimin e procedimit disiplinor ndaj gjyqtarëve dhe prokurorëve të të gjitha niveleve, anëtarëve të Këshillit të Lartë Gjyqësor, anëtarëve të Këshillit të Lartë të Prokurorisë dhe Prokurorit të Përgjithshëm.

Më tej, Metani iu përgjigj interesimit të tyre mbi aspekte të punës së institucionit, që nga marrja e ankesave të qytetarëve a institucioneve, shqyrtimi e verifikimi i tyre, hetimi disiplinor e procedimi, si dhe inspektimet tematike e institucionale.

Pjesëmarrësit e programit njëvjeçar LEAD Albania, janë profesionistë të rinj, të shkolluar brenda e jashtë vendit, të cilët përmes kësaj eksperience, kanë mundësinë e përvojës së drejtpërdrejtë në procesin e qeverisjes, përmes angazhimit për një vit, si pjesë e kabineteve të institucioneve më të larta shtetërore në vend, në rastin e klasës 2025, pranë kryeministrisë, ministrive të ndryshme, e deri tek institucione të drejtësisë, si Këshilli i Lartë Gjyqësor.

Burimi ATSH