Eksportet e mallrave gjatë muajit janar të këtij viti, arritën vlerën 31 miliardë lekë, duke u rritur me 4,9%, në krahasim me të njëjtën periudhë të një viti më parë dhe 21,7%, në krahasim me dhjetorin e 2024-ës.
Referuar raportit të tregtisë së jashtme, të publikuar nga Instituti i Statistikave (INSTAT), në rritjen e eksporteve prej 4,9%, ndikimin kryesor e ka dhënë eksportet e mineraleve, lëndëve djegëse dhe energjia elektrike me 13 pikë përqindje. Po ashtu eksportet e ushqimeve, pijeve dhe duhanit ranë duke dhënë ndikim negativ me 0,5 pikë përqindje. Njëkohësisht eksportet e makinerive, pajisjeve dhe pjesëve të këmbimit ranë, duke dhënë një ndikim negativ me 0,3 pikë përqindje.
Ndërkohë eksportet e materialeve të ndërtimit dhe metaleve shënuan rënie duke dhënë ndikim negativ prej 5,6 pikë përqindje në totalin e eksporteve.
Rënie patën edhe eksportet e tekstileve dhe këpucëve me 2,3 pikë përqindje, dhe produktet kimike dhe plastike me -1,1 pikë përqindje etj.
Referuar të dhënave të INSTAT-it, importet e mallrave arritën vlerën 60 miliardë lekë, duke u rritur me 0,1%, në krahasim me një vit më parë dhe duke u ulur me 23,5%, në krahasim me Dhjetor 2024.
Gjatë muajit janar, në rritjen e importeve prej 0,1%, krahasuar me janarin e 2024-ës, ndikim pozitiv dhanë eksportet e mineraleve, lëndëve djegëse, dhe energjisë elektrike me 1,67 pikë përqindje, ushqimeve, pijeve dhe duhanit me +1,65 pikë përqindje, produkte kimike dhe plastike me +0,99 pikë përqindje.
Ndërsa negativisht kanë ndikuar importet e materialeve të ndërtimit dhe metaleve me 3,3 pikë përqindje, makinerive, pajisjeve dhe pjesëve të këmbimit me 0,8 pikë përqindje, lëkurës dhe artikujve prej tyre me 0,14 pikë përqindje.
Deficiti tregtar i këtij muaji është 29 miliardë lekë, duke u ulur me 4,5%, krahasuar me janarin e 2024-ës dhe duke u ulur me 45,4%, në krahasim me dhjetorin e 2024-ës.
Burimi ATSH
