Kryeministri Edi Rama po merr pjesë sot në punimet e Samitit të Bashkimit Europian me Ballkanin Perëndimor, në Bruksel.

Në nisje të samitit, Rama u prit nga presidentja e Komisionit Europian, Ursula von der Leyen dhe presidenti i Këshillit Europian, António Costa.

Ndërkohë, liderët pjesëmarrës në këtë samit realizuan edhe Foton Familjare, pak para diskutimeve në tryezën e rrumbullakët të Samitit.

Temë kryesore e samitit BE-Ballkani Perëndimor pritet të jetë zgjerimi i Bashkimit Europian me përfshirjen e Ballkanit Perëndimor.

Gjatë samitit në veçanti pritet të trajtohen edhe Plani i Rritjes për Ballkanin Perëndimor, Plani Ekonomik dhe i Investimeve, Axhenda e Gjelbër dhe Digjitale për Ballkanin Perëndimor, si dhe fusha të tjera si Politika e Përbashkët e Jashtme dhe e Sigurisë, luftimi i kërcënimeve hibride dhe kibernetike dhe migracioni.

Sipas diplomatëve në BE, ky samit do të jetë rast për të diskutuar bashkëpunimin konkret në shumë fusha, prej asaj politike, të mbrojtjes dhe sigurisë, deri tek energjia. E gjithë kjo do t’u ndihmojë vendeve të rajonit që më shpejtë të bëhen gati për integrim në BE, duke forcuar në të njëjtën kohë edhe ekonomitë e tyre dhe duke rritur stabilitetin rajonal përmes zgjidhjes së mospajtimeve të tyre.