Në inaugurimin e Teatrit të Kukullave, ministri i Ekonomisë, Kulturës dhe Inovacionit, Blendi Gonxhja e vlerësoi teatrin si një institucion të dashur për brezat. “Godina e cila restaurohet pas 100 vjetësh ka luajtur një rol në historinë e qytetit dhe gjithë Shqipërisë”, u shpreh ministri i MEKI-t në fjalën e tij, duke kujtuar se fillimisht kjo ndërtesë shërbeu si klubi i oficerëve, më pas si godina e parlamentit e në vitin 1960 u transformua në teatër.

Gonxhja tha se, kjo godinë kontribuoi në krijimin e identitetit tonë kulturor.

Më pas ministri renditi një sërë polesh të rëndësishme kulturore të cilat po transformohen si, Muzeu Historik Kombëtar, Muzeu Kombëtar i Arteve të Bukura, Teatri Kombëtar që po ndërtohet nga themelet, Muzeu “Besa” në ish banesën e Toptanasve, Qendra e re Kombëtare Kulturore e Fëmijëve që do të inaugurohet së shpejti, etj.

Gonxhja theksoi se, gjithë kjo përpjekje synon më shumë se rigjallërimin e disa godinave por vizionin për të vendosur kulturën dhe artin në qendër të identitetit tonë kombëtar dhe zhvillimit shoqëror.

Ministri vlerësoi punën e madhe që është bërë për ta rikthyer Teatrin e Kukullave në identitetin e tij. “Më në fund kemi një teatër modern të gatshëm të shndërrohet në një pol të jashtëzakonshëm atraktiv për jetën e Tiranës, i denjë për brezat e sotshëm e të ardhshëm”, tha Blendi Gonxhja.

Sipas tij, vogëlushët spektatorë të këtij teatri do të jenë nesër jo vetëm qytetarë më të mirë por edhe politikanë më të mirë duke i kthyer një borxh parlamentit të dikurshëm që u mblodh këtu.

Burimi ATSH