Komisioni Parlamentar për Ekonominë dhe Financat miratoi sot marrëveshjen me Slloveninë, për bashkëpunimin në mbrojtje ndaj katastrofave natyrore dhe të tjera.

Zëvendësministri i Mbrojtjes Dorian Tola, tha se në këtë kohë kur rreziqet globale kërkojnë përgjigje të shpejtë dhe të koordinuar kjo marrëveshje përfaqëson një hap domethënës drejt një partneriteti më të fortë rajonal dhe ndërkombëtar.

Sipas tij, në kuadër të bashkëpunimit të ndërsjellë në menaxhimin e fatkeqësive natyrore dhe fatkeqësive të tjera, si dhe duke marrë parasysh rolin e Bashkimit Evropian, Kombeve të Bashkuara dhe organizatave të tjera ndërkombëtare, në drejtim të mbrojtjes nga fatkeqësitë natyrore dhe fatkeqësive të tjera, është nënshkruar marrëveshja për emergjencat civile me Slloveninë.

“Kjo marrëveshje rregullon kuadrin e kushteve të bashkëpunimit në menaxhimin e katastrofave për ofrimin vullnetar të ndihmës së ndërsjellë, në rast katastrofash në territorin e palës tjetër dhe format e tjera të bashkëpunimit të ndërsjellë”, deklaroi Tola.

Kjo marrëveshje, tha Tola, do të ndikojë në mënyrë të konsiderueshme në rritjen e mëtejshme të kapacitetit dhe reagimit të Forcave të Armatosura të Republikës së Shqipërisë dhe të Agjencisë Kombëtare për Mbrojtjen Civile në përballimin e situatave të krijuara nga fatkeqësitë natyrore ose nga fatkeqësitë e tjera.

(ATSH)