Arsimi profesional konsiderohet si rruga e sigurt drejt punësimit real, ndaj dhe qeveria shqiptare po mbështet me politika të veçanta kualifikimin e të rinjve në përputhje me nevojat e tregut të punës.

Në episodin 14-të të sezonit të tretë të Podkastit “Flasim” me temë “Zyshat e Shqipërisë”, kryeministri Edi Rama kishte ftuar tre mësuese për të diskutuar mbi temat kryesore të arsimit sot në Shqipëri.

Të ftuara në këtë podkast ishin Valbona Duka (Sulçaj) e cila punon prej 25 vitesh si mësuese e Gjuhës Shqipe dhe Letërsisë në Tiranë, Juliana Dollani, mësuese matematike në gjimnazin ” Kristaq Capo” Berat, si dhe Viola Jerina, mësuese matematike në Shkodër.

Duke trajtuar çështjen e arsimit profesional, kryeministri Rama nënvizoi nevojën për të shtyrë para reformën për arsimin profesional si alternativë e sigurt për integrim në tregun e punës.

“Duhet t’u japim mundësi nxënësve të fokusohen në një profesion pasi s’do të bëhen të gjithë shkencëtarë, juristë, ekonomistë etj,. Ka nevojë shoqëria, shteti që të ketë një armatë profesionistësh të të gjitha llojeve”, tha Rama.

Rama theksoi se “detyra jonë është të nxjerrim në pah talentin e fëmijëve”.

Duke folur për sfidat me të cilat përballet gjuha shqipe sot, kryeministri Rama shprehu shqetësimin për fatin e gjuhës shqipe, veçanërisht drejtshkrimin e saj.

“Drejtshkrimi i gjuhës shqipe është i presuar në mënyrë katastrofike nga e gjithë kjo prurje e përditshme në rrjetet sociale, e shkurtimeve, kapërcimeve, anashkalimeve të gramatikës. Më shqetëson kur shoh shkresat zyrtare”, tha Rama.

Në këtë drejtim, mësuesja e gjuhës shqipe, Valbona Duka vlerësoi zhvillimin e konkursit kombëtar të gjuhës shqipe, ndërsa u ndal te sfidat gjuhësore me të cilat përballen nxënësit sot dhe rolin e mësueses në këtë drejtim.

Mësuese Juliana Dollani veçoi rëndësinë e trajnimeve të mësuesve. “Trajnimet i kemi shumë të nevojshme. Nisma e Ministrisë së Arsimit dhe Sportit për zhvillimin profesional të mësuesve është një nismë shumë e rëndësishme, nismë kyç. Një mësues duhet të jetë pjesë e trajnimeve kombëtare e ndërkombëtare”, tha ajo.

Ndërsa mësuesja e matematikës Viola Jerina tregon se si pasioni për IT dhe trajnimet që mori në këtë fushë u përkthyen në rezultate konkrete te nxënësit e gjimnazit, të cilët kanë fituar edhe çmime ndërkombëtare në konkurse të IT-së.

(Marrë nga ATSH)