Ministrja e Shtetit për Rininë dhe Fëmijët, Bora Muzhaqi gjatë vizitës në Barcelonë, Spanjë zhvilloi një takim me Sekretarin e Përgjithshëm të Bashkimit për Mesdheun Nasser Kamel dhe Zv/Sekretarin e Përgjithshëm të Bashkimit për Mesdheun, John Paul Grech.

Muzhaqi zhvilloi gjithashtu një takim me delegacionin egjiptian, që drejtohej nga Zv/ministri i Rinisë dhe Sportit, Ismail Al-Far, së bashku me përfaqësues të tjerë qeveritarë dhe përfaqësi të organizatave rinore.

Bisedat u zhvilluan të dyja lidhur me mundësitë e bashkëpunimit me Bashkimin për Mesdheun, por edhe specifikisht me Egjiptin me fokus shkëmbimet rinore midis vendeve tona.

Ditën e djeshme Muzhaqi mori pjesë në takimin e Rinisë 2023, organizuar nga Bashkimi për Mesdheun, “Angazhimi rinor për një Mesdhe më të qëndrueshëm dhe gjithëpërfshirës”, në Barcelonë, Spanjë.

“Përfshirja e vetë të rinjve në hartimin dhe vlerësimin e Strategjisë Kombëtare të Rinisë është një metodë që zhvillohet për herë të parë në Shqipëri dhe njëkohësisht na krijon mundësinë ne si politikbërës të krijojmë politika në përputhje me kërkesat dhe nevojat e të rinjve, dhe zhvillimet e vrullshme teknologjike”, tha Muzhaqi në fjalën e saj në takimin e Rinisë 2023.