Ministrja e Turizmit dhe Mjedisit, Mirela Kumbaro është takuar në Forumin e Liderëve, në Gjenevë, me drejtoreshën ekzekutive të IUCN, Grether Auliar.

“Shumë e lumtur për forcimin e partneritetit me Unionin Ndërkombëtar të Mbrojtjes së Natyrës, të cilët i patëm bashkëpunëtorë të rëndësishëm në shpalljen e Vjosës Park Kombëtar si edhe tani, në rrugëtimin e hartimit të planit të menaxhimit për ta bërë një model të mirë të ruajtjes së balancave mes biodiversitetit dhe ekoturizmit”, ka shkruar ministrja Kumbaro në rrjetet sociale.

Në bashkitë buzë Vjosës është kryer edhe faza e dytë e konsultimeve publike, me banorë, organizata dhe biznese, në një proces që siç thotë edhe Kumbaro, është shembulli më i mirë i evoluimit të koncepteve dhe rëndësisë që ka bashkëpunimi me sektorin privat.

Vjosa, lumi i fundit i egër në Europë është shpallur Park Kombëtar (Kategoria II e zonave të mbrojtura mjedisore), nga burimi i tij deri te derdhja në det, duke përfshirë të gjitha degët dhe i ofrohet mbrojtje e plotë kombëtare dhe ndërkufitare.

IUCN është një organizatë ndërkombëtare që punon në fushën e ruajtjes së natyrës dhe përdorimit të burimeve të qëndrueshme natyrore. Misioni i IUCN është të “ndikojë, inkurajojë dhe ndihmojë shoqëritë në mbarë botën për të ruajtur natyrën dhe për të siguruar që çdo përdorim i burimeve natyrore të jetë i barabartë dhe ekologjikisht i qëndrueshëm”.
Në të aderojnë mbi 1400 organizata qeveritare dhe joqeveritare. Rreth 16,000 shkencëtarë dhe ekspertë marrin pjesë në punën e komisioneve të IUCN mbi baza vullnetare.