Ministrja e Shtetit për Marrëdhëniet me Parlamentin, Elisa Spiropali mori pjesë sot në Samitin e Tretë të Platformës së Krimesë, organizuar nga Presidenti i Ukrainës, Volodymyr Zelensky.

Spiropali theksoi se “agresioni brutal i Rusisë kundër Ukrainës mbetet kërcënimi kryesor për paqen dhe sigurinë në Evropë dhe më gjerë”.

“Ai përbën një shkallmim të hapur të parimeve themelore të sanksionuara në Kartën e OKB-së dhe një shkelje flagrante të së drejtës ndërkombëtare. Rrëfimet shokuese të mizorive dhe shkeljeve të të drejtave të njeriut në Krime dhe kudo në territoret e pushtuara, janë dëshmi e qartë se regjimet pushtuese janë reflektim i sistemeve totalitare dhe antidemokratike”, u shpreh ministrja.

Në vijim, Spiropali evidentoi se Shqipëria mbetet e palëkundur në angazhimin për të rritur më tej mbështetjen politike dhe praktike për Ukrainën ndërsa ajo vazhdon të mbrojë pavarësinë, sovranitetin dhe integritetin e saj territorial.