Kryeministri Edi Rama u shpreh sot se, djegia e pyjeve është një krim barbar që duhet të ndëshkohet pa mëshirë nga drejtësia.

Kreu i qeverisë përshëndeti me anë të një reagimi në rrjetet sociale Policinë e Shtetit, e cila theksoi ai, “përsëri reagoi me shpejtësi për kapjen e zjarrvënësit mbi Qeparo, ku zjarri i përhapur edhe nga prania e erës shqetësoi turistët e shumtë në mbrëmje, pasi forca ajrore ishte e detyruar të ndërpriste hedhjen e ujit nga lart si rezultat i errësirës”.

“Reagimet shumë efikase të policisë kanë bërë që me rihapjen e gjykatave, një sërë zjarrvënësish të arrestuar të dalin para gjyqit, ku uroj, shpresoj dhe bëj thirrje që të trajtohen me dënimet më të rrepta, për shkatërrimin e një pasurie të paçmueshme të vënë brez pas brezi, e cila u takon brezave dhe për cënimin e së cilës ligji parashikon deri në 15 vjet burg”, nënvizoi Rama.

“Djegia e pyjeve është një krim barbar që duhet të ndëshkohet pa mëshirë nga drejtësia, për ta bërë shumë të qartë se çfarë e pret në këtë botë një zjarrvënës, përpara se sa të digjet në ferrin e botës së përtejme”, u shpreh kryeministri Rama.