Kthesat e forta në jetë kryesisht nuk i zgjedhim, na dalin, është mënyra si i menaxhojmë çka na përcakton si individë. Natyrisht në emigracion “kthesa” në profesion është një ngjarje e zakonshme, por çfarë e bën të jashtëzakonshme një histori është moskompromisi me zhgënjimin dhe këmbëngulja drejt ngritjes. Kjo është historia e veçantë e elbasanlliut Ardian Daullja, i cili ka spikatur në fushën e biznesit të ndërtimeve metalike ose më saktë në artin e tyre.

Diplomuar në vitin 1993, me rezultate të larta nga Akademia Ushtarake Skënderbej, Ardiani shërbeu si ushtarak në qytetin e lindjes, Elbasan, deri në reformën e vitit 1998, e cila do t’i ndryshonte tërësisht rrjedhën e jetës. Për dikë që mbi një dekadë ka rutinë ditore disiplinën e hekurt, dalja jashtë saj dhe jashtë kufijve të atdheut për të cilët ka dhënë betim që duhet të mbrojë, është një moment dëshpërues. Këtë Ardiani e pohon sapo fillon rrëfimin e tij, ndërsa pranon se mungesën e një zanati me largimin nga vendi, ia kompesuan tërësisht vlerat e formimit ushtarak.

Athina u bë “vendlindja” e dytë e tij që nga viti 1998, por Elbasani do të farkëtonte profesionin e ri, si qytet metalurgësh i cili mbillte te çdo qytetar i saj dashurinë për metalet. Për 10 vite Ardiani punoi dhe u aftësua pranë një firme serioze greke, ndërsa paralelisht, në vitin 2004, thelemoi me ndihmën e familjes dhe miqve kompaninë “Con-Ardi” https://www.con-ardi.com/el/ në fushën e konstruksioneve metalike të të gjitha llojeve, ndërtim dhe rinovim banesash, e cila tashmë konkuron denjësisht në tregun grek, ballkanas dhe më gjerë. “Synimi ynë që në fillim ka qenë që “Con-Ardi” të arrijë nivele të larta, duke u bazuar në pasionin e njerëzve që e mbështetën dhe në objektivat e mirëpërcaktuara”- thotë Ardiani, duke mos fshehur dëshirën që këtë sipërmarrje ta ngrejë në të tjera standarde, djali i tij i cili diplomohet sivjet në degën e Inxhinierisë Mekanike.

Ardian Daullja është një figurë shumë e dashur edhe për komunitetin e shqiptarëve të Greqisë. I përfshirë aktivisht në strukturat dhe problematikat e komunitetit, që në ditët e para, ai u bë një zë i fortë për të drejtat e shqiptarëve dhe të huajve në përgjithësi. Sot mban postin e Kryetarit të Unionit të Shoqatave Shqiptare në Greqi, me një kontribut të veçantë në themelimin e mbi 10 degëve të saj në rrethe të ndryshme të Greqisë.

Ardiani ka një mesazh për të gjithë të rinjtë shqiptarë që aspirojnë botën e biznesit: “Me pasion, këmbëngulje dhe dashuri për atë që bën, asgjë nuk është e pamundur. Këtë jua thotë dikush, që në moshën 45 vjeçare, arriti paralelisht me punën, të përfundojë studimet e larta për Shkenca Politike në Universitetin e Pantios Athinë.”

Marrë nga postimi në Facebook në faqen zyrtare të Ambasadës Shqiptare në Greqi