Presidenti i Republikës, Bajram Begaj reagoi sot lidhur me Samitin e NATO-s, i cili zhvillohet në Vilnius të Lituanisë.
Begaj e sheh këtë samit si një moment të rëndësishëm për sigurinë euroatlantike.
Begaj shprehet përmes një postimi në rrjetet sociale, se Shqipëria mbetet e palëkundur në angazhimin e saj për të mbështetur përpjekjet e Aleancës për të forcuar masat e parandalimit dhe të mbrojtjes.
“Samiti i NATO-s në Vilnius është një moment kyç për sigurinë e rajonit euroatlantik. Vendimet e marra gjatë këtij samiti do të jenë të dobishme në forcimin e kohezionit dhe unitetit të Aleancës sonë, si dhe në ofrimin e mbështetjes së zgjeruar për Ukrainën. Shqipëria mbetet e palëkundur në angazhimin e saj për të mbështetur përpjekjet e Aleancës për të forcuar masat e parandalimit dhe të mbrojtjes”, shkruan Begaj.
Vendet anëtare të NATO-s do të mblidhen sot dhe nesër në Vilnius të Lituanisë ku do të diskutohet për situatën në Ukrainë dhe kërkesën e këtij shteti për t’u bërë pjesë e aleancës ushtarake.
