Kryeministri Edi Rama deklaroi sot se, fitorja e PS-së në zgjedhjet e 14 majit do të jetë e thellë në shumë bashki të vendit.

“Në një pjesë të madhe të bashkive, do fitojmë me një diferencë shumë të madhe. Në një pjesë tjetër që tradicionalisht ka qenë djathtas, gara është e hapur. Nuk ka asnjë bashki sot në Shqipëri që s’ka garë, deri në ditën e fundit. Mendoj që në të gjitha rastet, ne nuk do të biem nën 50. Ky është skenari minimal”, u shpreh Rama, në një intervistë për Vizion Plus.

Lidhur me bashkinë Shkodër, Rama u shpreh se, situata për këtë zonë mbetet komplekse, njësoj si dhe sfida për ta fituar atë.

“Shkodra hyn tek nga 49 deri tek 61. Është në diskutim dhe është në diskutim shumë seriozisht për herë të parë. Por, në të gjitha rastet është shumë e vështirë. Është një kompleks gjërash. Mendoj që kandidati ka ndihmuar që të ketë një lehtësi më të madhe për ta kapërcyer barrierën psikologjike dhe për të votuar jo, atë që vë aty, ajo që quhet e djathtë”, deklaroi Kryeministri.