Kryekomisioneri Ilirjan Celibashi dhe nënkryetarja e KQZ-së Lealba Pelinku kanë dhënë një deklaratë për mediet lidhur me procesin e votimit më 14 Maj.

Pelinku tha se qëllimi është që në qendrat e votimit të ketë 5 mijë operatorë të cilët do të jenë të mirëtrajnuar në ditën e zgjedhjeve lokale.

“Kemi shtyrë afatin e aplikimeve për shkak të mos mbushjes së qendrave të votimit me aplikantë, shpresojmë të kemi 5 mijë operatorë për qendër votimi. Gjithashtu, kemi shtyrë dhe afatin e trajnimit që në ditën e zgjedhjeve të kemi në nivelin më të lartë të votimit me operatorë”, tha ajo.

Celibashi theksoi se për herë të parë do të ketë të dhëna reale mbi numrin e pjesëmarrësve në votim.

“Kemi përmirësuar ndjeshëm gjithë sistemin e protokollimit të rasteve kur për arsye objektive nuk mund të bëhet identifikimi biometrik i votuesve. Kemi ndërtuar një sistemit të tillë që nuk lë shkak dhe mundësi për këdo që në mënyrë manipulative kërkon të shmangë identifikimin biometrik”, deklaroi ai.

Celibashi shtoi se “një votues nëse do të përdorë një mënyrë për ta shmangur identifikimin biometrik do të jetë qartësisht e evidentuar se për çfarë arsyesh. Kemi pasur raste që i kemi identifikuar, ku votues të caktuar ka gjetur mënyrën e shmangies së vënies së gjurmës së gishtit”.

Kreu i KQZ-së, theksoi se “gjë e shtuar në këtë sistem është transmetimi në mënyrë periodike i të dhënave mbi pjesëmarrjen në ditën e zgjedhjeve. Për herë të parë, falë kësaj teknologjie, ne do kemi të dhëna reale mbi numrin absolut të pjesëmarrësve në votim, nuk do ta bazojmë përqindjen në sondazhe, por në faktin konkret dhe ne këto të dhëna do t’i bëjmë publike”. /ATSH