Ministri i Drejtësisë, Toni Gogu, zhvilloi tre takime në Romë me përfaqësues të institucioneve italiane, me fokus forcimin e bashkëpunimit mes Shqipërisë dhe Italisë në fushën e drejtësisë.

Gjatë vizitës në Senatin italian, Gogu u takua me kryetarin e Komisionit të Punëve të Jashtme dhe Mbrojtjes, Maurizio Gasparri, të cilin e falënderoi për ratifikimin e Marrëveshjes së Bashkëpunimit Strategjik mes dy vendeve.

Në këtë takim u diskutua mbi përvojën italiane në kthimin e pasurive të konfiskuara nga krimi në shërbim të komunitetit.

Ministri Gogu zhvilloi gjithashtu një takim me bashkëpresidentin e Gjykatës së Kasacionit, Stefano Mogini, ku diskutuan për njësimin e praktikës gjyqësore dhe digjitalizimin e vendimeve. Sipas Gogut, ky është një proces bashkëpunimi që përcaktohet nga vetë gjykatat dhe që mbështetet nga Ministria e Drejtësisë.

Ndërsa në takimin me kryetarin e Komisionit të Drejtësisë të Dhomës së Deputetëve, Ciro Maschio, bisedimet u përqendruan te reformat që synojnë shkurtimin e proceseve gjyqësore, uljen e kostove dhe ofrimin e një drejtësie më të shpejtë për qytetarët.

“Përvoja italiane është e vlefshme për t’i kthyer këto diskutime në zgjidhje konkrete edhe në Shqipëri”, u shpreh Gogu në një reagim në rrjetet sociale.

Burimi ATSH